السوق بيعاني من ازمه ثقة كبيره سواء مع المطورين و مع شركات البروكرز وخاصه مع الاحداث العالمية من رفع سعر دولار وزيادة التضخم وسعر الفائدة إللي خلت العميل محتار يعمل إيه بفلوسه ويستثمرها إزاي وفي نفس الوقت شايف قدامه شركات تطوير و اساميها المفروض كبيره بتتعثر ومش بتقدر توفي بالتزاماتها تجاه العملا بتوعها وده خلق حاله من الفوضي وعدم الثقة في أي حاجة بتتقال من مطور أو سيلز بروكر لو اتكلمنا علي شركات التطوير بنلاقي مشاكل كبيره مش بتتحل أو مش عارفين يحلوها زي زيادة تمن الأراضي إللي خلي شركات كتير في كل حتة في مصر مش قادره توفي التزامتها في الاقساط وبتطلب أعاده جدولة ليها زي زيادة أسعار مستلزمات البناء والقيود علي الاستيراد زي فقر طرق الماركتينج للمطورين إللي خلي العميل يشوف المشاريع كلها شبه بعضها ومفيش ميزه تنافسيه أو قيمه مضافه إنه يشتري في مشروع معين علشان كله شبه بعضه وكمان المفروض إنت كمطور محترم وعاوز تبني لنفسك براند قوي في السوق تبقي عندك إدارة مخاطر وعامل حسابك وحاسب حسبتك مظبوط لاوقات زي دي علشان متلبسش وتلبس عملاءك معاك ويلاقو نفسهم مجمدين ملايين في شويه
طوب وخرسانات مش بتتباع أو حتي مبتوصلش للمرحله دي
ده كمان خلي المطورين يتزنقوا في البيع ويبتدوا يعملو اوفرات مش محسوبه ويعلو العمولات لشركات التسويق خلت العميل يستكتر الفلوس علي الشركات ويزاحمهم فيها و يطلبها بشكل صريح علشان شايفها طالعه من وحدته في الاساس.
-الدولة بتحاول تحل مشاكل من خلال قوانين وتشريعات تظبط السوق بس لسه مشفناش ده هيطبق إزاي علي ارض الواقع وهيعالج مشاكل ويظبط السوق ولا لا.
-شغلك كمطور لازم يبقي واضح وصريح للعميل من تسليمات لمنتج مختلف لعناصر نجاح ومقومات محترمة علشان لما يجي يشتري أو بديلك فلوسه يبقي عارف فلوسه هتزيد وتكسب يبقي عارف إنه لما يجي يرسيل وحدته هتتباع بسرعه وعارف إنه لما يعيش هيتبسط هوا وعيلته وهياخد صيانه ومستوي معيشي محترم يستاهل كل الفلوس إللي اتدفعت فيه.
-شغلك كمسوق أو بروكر في عز الأزمة إللي حاصله دي إنك تذاكر سوقك كويس وتعرف الفرص فين علشان لما تكلم العملا عليها يبقو شايفنها فعلا مش أي هبد وخلاص علشان العموله الكبيرة عميلك ده رأس مالك مكمل معاك long relationship هتبيعله وتعمله ريسيل وتاجرله وتبيع لاقربائه وصحابه وتخليه سفير ليك بشغلك معاه ومع دايرته لازم تكون عارف إنك مسؤول عن محفظه العميل العقاريه وشغل بيع واجري ده العملا تعبت ولبست فيه كتير فلو لقي حد بيقوله الفرصة فين بما يرضي الله هيكمل معاه ويثق فيه.
-كعميل وإنت بتشتري استشير حد بيفهم متدورش علي العموله بس أو السعر بس دور علي المطور إللي هيكسبك صح وعنده فرصه حقيقية وتعرف لما تبيع تاخد فلوسك بسرعه في الأزمة دي حتي لو هتشتري بنفسك دور الريسيل و الصيانه وتسليمات المطور ده عامله اية ووضعه إيه في السوق أيا كان المشروع تحت الإنشاء ولا تسليم فوري المهم تشوف الفرصة فين كويس.
ربنا يعدي أيامنا علي خير ونخرج منها اقوي ومتعلمين أحسن كلنا بإذن الله
لا تعليق