كنت اتكلمت قبل كده عن مطورين عقاريين صنعو فارق وتغيير في شغلهم ومشروعاتهم بسبب إنهم دورو علي المختلف والجديد وعملوه زي طلعت مصطفي وأحمد بهجت الله يرحمه وحسين صبور الله يرحمه وياسين منصور ومحمد العبار وغيرهم اسامي كبيره ومحترمه واسمهم وشغلهم ظاهر وباين وفعلا ليهم بصمه كبيره بس إللي إحنا شايفينو في السوق دلوقتي العكس تماما مطورين جداد واخدين مشروعات أكبر من حجمهم ديزاينات مشروعات صعبه التحقيق علي ارض الواقع للشركات الكبيرة ما بالنا بإللي المتوسطه والصغيره إللي الجلابيه واسعه عليهم من الأول و مطورين قدام بيطرحو مشروعات ويقعدوا بالسنتين تلاته يلمو فلوس من العملا ومبيحطوش في المشاريع طوبه وهيلبسو ويلبسو عملاء هم معاهم والحمد لله الدولة ابتدت تاخد بالها من الموضوع ده و ابتدينا نشوف مناقشات للقوانين التنظيميه إللي هتساهم في لم لغبطه ومشاكل السوق شويه زي ال30 ٪ انشاءات وال escrow account والحسابات إللي هتتراقب من البنك لمتابعه الانشاءات بس بعيد عن كل ده أنا شايف إن المطور إللي عاوز يكمل ويركب السوق لازم يكون اذكي من كده وميستناش الدولة تفرض عليه قوانين تنظيمية يتغلب بيها علي تخوفات العملا يبقي سابق السوق بخطوه مستني أشوف المطور إللي ميفتحش بيع في مشروعة غير لما يخلص بناء كل المشروع أو علي الاقل 70٪ منه بأسعار محترمه ومناسبة للعميل والسوق زي ما هيئه المجتمعات بتعمل في مشروعات كتير ليها مستني أشوف المطور إللي يبيع للعميل وحده جاهزه مفروشه وجاهزة للإستثمار كمان مستني أشوف المطور إللي يبيع منتج جديد هو أول واحد ينزل بيه في السوق العقاري بس ميبيعوش للعميل إلا لما العميل يجربه ويستمتع بيه زي المنتجعات السياحيه في الساحل والسخنه وشرم الشيخ والغردقه ومرسي علم ومطروح. مستني أشوف وحدات سكني و اداري و سياحي تتباع تمويل عقاري ايأ كان سعرها وبشروط أسهل من التعقيد إللي المبادرات بتاعت دلوقتي عملاه.
أنا عارف إن دي أحلام ممكن تكون صعبه علي الطريقة إللي السوق ماشي بيها حاليا وصعبه علي الملاءه المالية لكتير من المطورين بس ده مستقبل الصناعة إللي لازم كله ياخد باله منه ويعمل حسابه عليه لإنه جاي جاي حتي البنوك إللي خايفه تمول مطورين وأراضي حاليا وإللي مطلوب منها دور أكبر الفترة الجايه هتتشجع للشكل ده من البيع أو التطوير نتمني ده يحصل ونتوسع فيه
لا تعليق