ازاي يبقي عندك دايما عملا جديده. وتجيب تارجتك بسرعه

لما بنيجي ننصح اي حد في السيلز عاما والعقارات خاصاَ بنقول لازم يبقى دايما معاه ال tools اللي بيعتمد عليها في شغله واللي هتساعده في اي شركه رايحها وتخليه مختلف دايما.
-أول حاجه بتعتمد عليها مع السيلز ال social network ودي مهمه جدا ازاي تبقي شغال في العقارات واللي حواليك معارفك قرايبك اصحابك كل الدواير اللي حواليك مش عارفين طب دول لما يشتروا مين هيبعلهم خلينا عارفين دايما ان اي حد بيشتري اي منتج بيدور علي حد من معارفه بيبيع المنتج ده علشان يبقي واثق فيه ومؤتمنه على البيعه فما بالك بالعقارات اللي الناس بيحطو فيها تحويشه العمر او استثمار وبيفضلو يدفعو اقساطها لسنين كتير طب نعمل ايه:
#لازم مواقع التواصل بتاعتنا زي Facebook, instegram, LinkedIn, YouTube عليها دايما اعلانات اخبار عقاريه مشاريع جديده فرص عروض علشان اللي شايفنا دايما واللي عندنا اول ما يشوف ده احنا اول ناس يكلمها ونبيعله. ودي كمان تنفعنا في ال Personal branding
-تاني حاجه ال recommendations او ال word of mouth لما تبيع بيعه واتنين وتتقي ربنا في بيعتك وتخدم عميلك مظبوط ويحس بده فعلا هيبقي اول واحد يجيبلك بيع على الجاهز لأنك خدمته فاول واحد هيقابله عاوز يشتري هديهولك انت ويتكلم عليك كويس جدا وال social network بتاعته هتتحول اداه بيع ليك وانت مش عارف علشان كده لازم تخدم عميلك وتتابعه حتى بعد البيعه احنا دايما بنقول للسيلز انها Long life time relationship هتشتري لعميلك وتبيعله وتاَجرله وحدته لو عاوز وتسأل عليه وتتابعه دايما.
– تالت حاجه ال referrals وده من عميل قديم او حتى من عميل مشتراش منك بس ممكن يجيبلك حد يشتري سواء بعموله او خصم على وحدته او خدمه اياَ كان.

خلينا عارفين ان #جو جيرراد اعظم بياع في العالم اللي دخل موسوعة جينيس علشان باع اكتر من ١٤٠٠ عربيه في سنه بيقول في كتابه ان اللي خلاه يعمل الرقم ده دايما حاجتين كان بيستقبل العملا كويس فبيعملو ليه recommend على طول و َبيطلبوه بالاسم وكمان السماسره او الreferrals وقال إن كل واحد بيشتري حواليه ٢٥٠ واحد ممكن يشتروا لو بيعتله صح وكسبته هيجيبلك ال٢٥٠ دول.

-رابع حاجه الlife style بتاعك اخباره ايه بتخرج فين وبتقعد مع مين وليه مش بتفكر تروح أماكن فيها ناس بيشترو عقارات وتتعرف عليهم وتبيعلهم زي نادي، جيم، كافيه، شركه معينه ، مش بقولك روح اقعد الناس بالعافيه بس العلاقات بتوصل لعلاقات أوسع وأهم وهتوصلك للي هتحتاج تبيعهلم واحده واحده.
-خامس حاجه ال cold calls ودي من الأساسيات في شغلنا مهما اتطورت أساليب التسويق والبيع ودي ممكن ناخدها من حد او شركتك توفرها او بشرط تكلم الداتا بطريقه معينه وفي بوست ليا بيشرح الموضوع ده تحديدا هتلاقوه هنا على الجروب.
-سادس حاجه و Campaign اللي شركتك بتعملها ودي خليتها في الاخر لأنك لو عملت اللي فوق مش هتحتاج من شركتك حاجه وفي الأول والآخر يمكن ال Campaign تساعدك في البيع بس في الاخر هيا date الشركه مش بتاعتك فلما تسيب الشركه مش هتاخدها معاك.

بشكل عام السيلز اسلوب حياه واللي يحبه ويعيشه هيستمتع بيه وهيعرف يشتغل ويكسر الدنيا ايا كانت المعوقات اللي تقابله.

#اخيرا التنظيم مهم اوي في استخدام الtools دي وممكن تجربها كلها وتلاقي طريقه او اتنين يجيبولك احسن نتايج بس دايما بنقول استخدم كل اسلحتك وسيبها على الله اللي لايضيع اجر من أحسن عملا ابدا وعمره ما هيضيع تعبك.